政府將工程外判就見得多，原來職業足球嘅組軍工作都有外判，唔單止球迷聞所未聞，就連我求大俠喺球圈打滾咁多年都未聽過。究竟邊隊波咁創先河？咪就係啱啱經歷第三次「地震」嘅南華囉。
南華足主張廣勇前晚透過傳媒澄清，絕無聘請李潤華同任煒雄做正、副領隊時，自爆球隊組軍工作，原來已經外判咗畀顧問李潤華，季內亦會同呢位「外判商」繼續合作，協助南華組軍。曾經做過南華領隊嘅李潤華，目前喺隊內冇任何職位喎。
李潤華撬走梁子成
南華今季用呢種咁新穎嘅組軍方式，就引嚟球迷喺網上熱烈討論（見附表），有球迷認為球隊組軍外判好新穎，值得深入探討吓；我求大俠收到消息，早兩季使咗東方15萬轉會費，喺橫濱FC（香港）買返嚟嘅梁子成，早幾日突然轉咗去主要對手南華，呢單轉會就係「判頭」李華幫「少林寺」簽新兵嘅頭炮。
東方反擊截李康廉
東方見少林新任判頭李華成功從佢哋度撬走咗個翼鋒，噚日即時反擊，公佈簽咗早前盛傳好大機會重返少林嘅港腳翼鋒李康廉。東方總監梁守志話，康廉上季尾入院做咗手術根治腰患，目前已經康復，醫生亦畀晒證明，話佢冇晒事，簽佢返嚟應該幫到手喺新球季爭取好成績。
另外，南華足主張廣勇噚晚回覆查詢，話並唔係所有組軍工作都外判，只有梁子成係由顧問李潤華引薦畀教練米路，其餘球員係已離職嘅副領隊高志超簽入。
佢哋仲喺噚日公佈，簽咗現年31歲、來自利比亞嘅澳洲籍前鋒寶馬（Boima Karpeh）；呢件身高1米88、踢過澳職珀斯光輝嘅黑人前鋒，係由教練米路自己搵返嚟，米路話寶馬有速度，把握力唔錯，加上有身高，希望佢可以盡快適應香港環境，喺開季時以最佳狀態亮相。
至於盛傳回歸南華做副領隊嘅任煒雄，唔知係咪因為單消息過早曝光而見光死。據聞南華體育會最高領導層，好罕有咁就呢件事開聲，搞到張廣勇要立即同任煒雄劃清界線，講明雙方冇關係，張廣勇仲話搵李潤華同任煒雄上山，係傳媒受謠言被誤導喎。
識睇，一定係睇足英台【英波Live】：
http://soccer.appledaily.com
http://bit.ly/engballlive