當年資訊未如今天發達，國際大賽是大球會重點「選秀」時機，尤其來自東歐、亞洲的球員，單靠球探現場觀察，或幾盒低清錄影帶，怎及親眼看着他們踢球實在？最經典是96年歐國盃，殺入決賽的捷克即有尼維特去拉素、普波斯基投曼聯；98年世盃後有伊朗的馬達維基亞加盟德甲波琴；還有02年世盃後投奔歐洲的朴智星、李榮杓。
但千禧年後，資訊爆炸，各地聯賽或世青盃等青年國際賽隨時有直播，甚至搜一吓YouTube亦可盡覽無遺；加上歐洲放寬外援限制、歐聯擴充又讓大量「小國」球會參戰，像舒夫真高首次參加世盃時早已成名。大賽揀蟀？似乎已經out咗。
大賽閱兵最佳舞台
不過世事好得意，發展到某點又會返轉頭：當所有球員均在21歲便已是「星」，個個未捧過盃已被捧到上天，到底誰是真正球星？大賽又變成試煉最佳舞台。球員重要關頭的穩定性、能否應付壓力以至「孭起隊波」，無所遁形。今屆美洲國家盃，巴拉圭就打起了10號仔達里斯干沙利斯（圖），相信他很快不會只踢巴素利。至於八強出局的巴西，尼馬沉唔住氣搞到停賽固然令人失望；而事先張揚高價過檔利物浦的羅拔圖法明奴，首次於大賽入選國腳，適逢尼馬停賽更令他「孭」重飛；可惜四仗只入一球，令人印象最深可能是敗給哥倫比亞一役面對空門射失……紅軍迷咪詛咒我住！我啲眼光點同羅渣士比？應該係我唔識貨箒！
方栢翹
now足球評述員