曾鈺成自爆被竊聽，難怪唔少政界中人噚日又再人心惶惶，覺得被偷聽係防不勝防。八方噚日專登請教過私家偵探張大偉，佢話其實過往都有唔少立法會議員，都請過佢去佢哋嘅辦事處甚至屋企，睇吓有冇被人裝咗偷聽器，大體上嚟講都係冇乜發現，但唔少人為咗自保都會裝番套監察系統安心一吓。
八方叫佢過兩招畀政界中人防止被偷聽，佢話最重要當然係唔好用固網電話啦，最易被勾線；就算係手機，啲微信、WhatsApp都唔好用嘞，好易資料外洩，而一旦發現有乜唔妥，當然最好即時搵專家幫手check，有需要時裝番套反竊聽器。
但原來張大偉覺得，至醒嗰個係長毛，因為防止被偷聽，最好係面談，「長毛成日蒲蘭桂坊，嗰度咁嘈，傾嘢肯定冇人偷聽到，最叻其實係長毛」。