[大帝暑假搞乜鬼？NBA「大帝」勒邦占士（LeBron James），舊年暑假提早結束同熱火嘅合約，宣佈回歸母會騎士；今個夏天，大帝又再跳出合同，成為𠵱家最大牌嘅自由身！不過咁，大家都預佢將會簽新約留隊，唔會又做反骨仔走佬嘅。
孖住路夫泳池密斟
singlepic id=19623240 w=160 h=120 float=right]據多間美國傳媒報道，大帝周日已經知會騎士，將會跳出來季高達2,060萬美元（約1.6億港元）人工嘅合約，七月一號就會成為自由身。雖然係咁，冇咩人擔心舊年夏天先「愛回家」嘅佢又再離家出走；一般相信大帝只係睇定個勢，確保騎士可以保留有能力爭冠嘅班底，先至再以天價簽新約；早佢幾日宣佈跳出合同嘅路夫（Kevin Love），就係一大關鍵嘞。
路夫講過幾次應該會留喺克里夫蘭，但始終佢由以前效力木狼做「新狼王」，上季過到騎士淪為「三弟」，加上佢一直有興趣加盟嘅塞爾特人同湖人都繼續招手，難保佢唔會心動嘅。不過，周日就有人目擊占士同路夫喺泳池見面，有圖有真相，好難唔令人推斷佢哋係商量緊去向；但《ESPN》話，兩位只係純粹朋友身份出嚟玩，唔係傾轉會喎。
另一邊廂，快艇中鋒D佐敦（DeAndre Jordan）睇嚟就受夠做三弟嘞。26歲嘅佢即將約滿成為自由身，據講屬意返老家侯斯頓打火箭，但另一支德州勁旅小馬都對佢有意思；據講過去兩周，佢都有同靚仔前鋒柏臣斯（Chandler Parsons）密會，唔知柏臣斯嘅誠意會唔會打動到DJ呢。