後政改年代嘅首個7.1大遊行，條路點行落去，要睇吓大家點抉擇，但八方點都會同大家一齊行。由法律界人士組成嘅法政匯思，當日都會上街，仲會擺街站為大家打氣，原來佢哋搵咗余若薇、長毛同何俊仁，為Tote bag提字，我哋雖然政改上唔要袋住先，不過呢個袋，可以買咗先，據講限量製造幾百個，每個100蚊。
法政匯思仲趕喺7.1前印好本新書《看圖識治》，用簡單圖像介紹香港政治、選舉制度，據講本書由理大學生製作，搵政治學者做顧問，八方睇過，幾益智兼通識，初版數量有限，每本100蚊，呢啲紀念品，賣出後扣除開支，主要為「雨傘援助基金」籌款。