浸大校長陳新滋做滿5年，聽日正式退休。有傳佢因為高調同政府搶地籌建中醫院得罪梁班子，搞到冇得續約。陳校長噚日話任內冇遇過校監梁振英干預，亦冇發生過政治干預學術自由事件；決定退休，只不過覺得係時候交棒。
陳新滋自評任內表現係僅僅及格嘅60分，淨係處理李惠利地皮表現就要扣30分。佢怪自己唔夠牙力，同班官又唔夠friend，冇辦法說服政府將地皮撥做中醫院。
雖則話有遺憾，但校長就冇後悔，引經據典話不孝有三，其中「阿意曲從，陷親不義」呢句到今時今日，無論對政府、對學生都仲講得通。李惠利塊地起豪宅，真係未必對社會最有益，固然要出聲。對學生亦一樣，舊年畢業禮拒向舉黃傘學生頒畢業證書，正因為典禮係大學最莊嚴儀式，唔適合表達不滿。佢話退休後唔會做政府公職，專心做科研。