環球股災，A股戲劇性狂插，昨日buy-side朋友們個個仰天長嘆。即使他們早前已減磅，但大市如今咁跌法，怕且只能繼續配合沽落去，意味早前積累的回報一筆勾銷，今年又要「白做」了。
A股由高位至今已累跌超過20%，技術來說已算步入熊市，當日隨A股狂牛而出現的「港股大時代」，僅半年貨仔，亦幾乎打回原形。其實中央托市救經濟的決心毋庸置疑，只可惜阿爺「又要威、又要戴頭盔」，一邊放水唱好股市，一邊要中證監打孖展、放新股，但其「操盤技術」卻又粗糙兼混亂，以為清理場外融資，轉過頭減息降準就會無事？奈何計劃總追不上變化，打孖展力度過狠、所引發的心理和連鎖效應，連阿爺自己都始料不及。至於大家憧憬的經濟回穩、財富效應？半年來仍無兌現。結果，落藥力度越猛，市場越麻木，最後崩盤如散沙。
現在問題來了：阿爺仲有咩招？昨日下午傳出中證監開緊急會，傾暫停IPO，另外保監要求保險資金5,000億元入市，又話中央很快就會批准逾3.5萬億元養老基金最多30%可入市，希望拯救這隻奄奄一息的「改革牛」。然而，今轉被夾爆倉的投資者重創，散戶被套牢，外資拒絕落叠，阿爺買完，誰人接力？到最尾，一日外資不落場跟玩，升市難長期維持。最後又去到終極大招：人民幣改革及開放資本賬。
海迪