港龍機師于子猇（Jeff）同國泰空姐蔡倩婷（Cindy），噚日威盡將軍澳運動場。前者以63米98刷新香港男子標槍紀錄，後者就以3米40破咗女子撐竿跳港績，兩個齊齊喺香港城市田徑錦標賽奪得銀牌。
標槍cool魔成名於學界
一連兩日嘅城市錦標賽，噚日喺攝氏33度高溫下完成，28歲嘅Jeff一完比賽就急不及待「晒肌」，呢位好有自信嘅港龍副機師，早喺2006年已經代表彩虹邨天主教英文中學，造出學界D1標槍紀錄60米43（標槍重700克、紀錄至今未被打破），同年佢亦以57米25（800克）刷新港績，只係到2012俾許懷熙打破。噚日二人同場較量，結果Jeff以出乎意料嘅63米98打破許懷熙嘅63米89舊紀錄奪亞，冠軍係造出66米47嘅浙江選手吳貽兵；而許懷熙就得第五。
大學時先希望做飛機師嘅Jeff，𠵱家喺港龍主要做即日來回線，離唔開大陸或者東南亞，最難忘一次，係舊年載過包括長跑天后姚潔貞在內、一班去布吉參加亞沙運嘅田徑隊友，佢話：「我通常喺朝早六、七點飛，下晝兩、三點放工，之後去田徑場練習。標槍同飛行一樣，都需要專注力，兩樣都有挑戰，所以好享受飛行，亦享受每次嘅標槍練習。」以破港績作為祝賀中學50周年校慶嘅Jeff，被問到電視劇《衝上雲霄II》裏面邊個機師最靚仔，佢都話「cool魔」張智霖，事實上，身高1米80嘅Jeff，樣貌都唔輸蝕㗎！
冇腳雀仔享受撐上半空
至於26歲嘅國泰空姐Cindy好健談，佢話細細個就覺得自己係「冇腳嘅雀仔」，一定唔可以返朝九晚五嘅工，加上鍾意旅遊，所以畢業後決定做空姐。Cindy大學一年級先至開始玩撐竿跳，噚日就以3米40刷新港績得亞軍（冠軍都係浙江選手俞欣欣，成績係3米60）；至於香港舊紀錄係丁可翹喺今年五月造出嘅3米30。
第二年做空姐嘅Cindy，最難忘試過一落機，連妝都未落就去田徑場練習。早前國泰出現工潮，佢都話自己人工唔高，加上香港玩運動嘅，尤其係撐竿跳嘅資助唔多，一支竿要4,000幾蚊港幣，要同教練夾錢先買到，而且香港唔係好多人玩，全因為興趣先至繼續玩落去，仲話：「好享受撐竿上到空中嘅感覺。」至於今年嘅目標，佢就話希望可以突破3米60，到時再創新港績。
