劉浩龍（師兄）因為污糟手言論俾網民狂插，雖然女友容祖兒開晒口幫佢求情，希望大家盡快原諒師兄，但似乎冇乜作用，而師兄仲因為呢單嘢俾公司雪藏，搞到要潛水避風頭。不過，師兄有師兄潛水，祖兒就繼續風騷濕平，未見祖兒因為男友件事而搞到自己心情低落。
仔細研究間隔
大前晚7點左右，戴住副黑超、着住黃、黑間條裙仔嘅祖兒，一個人走咗去銅鑼灣利園商場間名店Anya Hindmarch睇手袋。天后駕到，店員當然唔敢怠慢，兩個店員全程貼身招呼祖兒，先後攞咗幾款手袋同catalogue畀祖兒睇。見祖兒對細細個嘅手提包包最有興趣，佢睇咗幾個款同顏色，好仔細咁打開睇間隔，又同店員不停吹水研究，之後甚至踎低睇飾櫃嘅陳列品。揀咗成25分鐘，最後揀咗個鮮黃色手提包包，之後，祖兒竟然對鏡即席拆散頭髮再紮髻，手法極純熟。
其實平時祖兒工作以外時間見到記者都好避忌，但當日佢買買吓嘢發現有記者影相，都完全無損心情，繼續濕平，甚至揮手同記者打招呼，心情可謂靚到爆。另外，楊婉儀同老公以及一對仔女當日亦現身利園行街街，真係好溫馨呢！
撰文：馮仁昭