勞工及福利局局長張建宗噚日出席由社聯同港大公共衞生學院合辦嘅「快樂家庭廚房全城運動」啟動禮，活動其中一個主題係健康飲食，佢分享嗰時話，一般人主張「三少」，佢做足「六少」，除少油、少鹽、少糖，仲少燒（燒烤）、少炸、少煎，另外加上「多多」同「一飛一走」，即多運動、多笑容，「飛」蛋黃同走皮。局長經常有應酬，如果晚上有飯局，佢中午會食隔夜餸，總之要清淡，早餐就食麥皮同水果，再加杯奶。
要健康，運動都好重要，港大林大慶教授現場教大家踩空氣單車，局長即場跟住做，仲笑住話立法會若然拉布，可以做足3個鐘。至於全球幸福指數香港排120位，佢話應該有錯，民調單位一定睇漏香港家庭廚房情況，中國人食飯講求開心兼齊齊整整，計埋呢個因素，幸福指數最多咪排2、30位。