建制派世紀大蝦碌之後，跟手上演一幕「全家冚包散」，曾主席被爆大鑊，WhatsApp對話外洩，手法似曾相識，斬頭行動快狠準，謝偉俊、吳亮星之流怎會有此「賊膽」，幸好今次泛民學精咗，冇變成追殺曾鈺成之工具，只係例牌提個不信任動議，但曾主席政治形象已大受打擊，此借刀殺人手法，心寒！
後政改期最核心尖銳的政治鬥爭，已經不再是泛民與建制之爭，年底區選主要矛盾是傘兵與傳統泛民會否能成功協調，明年立會選舉則是世紀大蝦碌引發建制洗牌換血潮，葉國謙、譚耀宗、陳婉嫻一代會否告退。真正最尖銳角力係在建制內爭奪2017行政長官寶座，2012種種手段將又再一次上演。觀乎世紀大蝦碌真正得益者，並非食花生食到滯之泛民，而是一直做政改旁觀者，扮晒塘邊鶴嘅689。本來政改應該由特首孭重飛，由佢向中央建議2017普選方案，但由於佢民望低殘，北京就代佢行呢一步，以八三一人大決議方式公佈巨細無遺的普選方案，代689承擔所有政治責任。至於台前做Sale屎，則交予林鄭，689就頻頻放假去玩。
到表決日，本應在立法會內數人頭，跟出跟入之專業狗仔隊，應該是由政務官負責，由特首辦作總指揮，而非林健鋒及葉國謙，兩人手上無兵可隨便出入議事廳，邊有力做黨鞭，如果有狗仔隊每小時報數，又點會在最後關頭先知漏咗劉皇發呢？至於誰人決定在立法會議事廳怠工放軟手腳，應該好容易知。𠵱家由中聯辦向建制派查找不足，恐怕冇乜實際效用，真正要問責者，並非立法會議員。
打民生牌為連任鋪路
至於「618慘劇」後翌日，689立即變身擺出和善友好姿態，首先撤回創科局撥款申請，跟手立即約見兩大政敵公民黨及自由黨，說要商討民生施政，變面之快，令人側目，而建制派頭目仍在痛哭謝罪之際，佢已全速與政改切割，換上另一套外衣做其民生特首搞連任工程了。其實佢任期已快完，2017年初就會有新特首，中央在2016年第一季兩會期間就會就人選拍板。而明年施政報告就已埋尾，還有甚麼重大民生施政要朝野商討呢，當前急務主要是要特首交代選舉承諾進度，如標準工時、全民退保、建屋不達標及小班教學，有邊瓣做唔到，點解失敗，清清楚楚交代，而唔係亂噏一切賴土地供應不足。
泛民班懵佬懵婆仲儍更更，心甘情願去為佢抬橋，搞民生議題？𠵱家係要689為重大民生政策失敗找數，而且既然泛民堅持提重啟五部曲，又點可能忽然跟隨689去搞民生呢？儍的嗎？2005年老董落台，係死於2004年七一遊行，而非2003年七一五十萬人上街，因為04年有三十幾四十萬，北京先至決定要老董走。689急於做好人，放棄政治鬥爭，即刻要見公民黨，其實就係怕今年七一，數十萬港人一齊叫佢下台！將其連任大計打碎。
添馬男