【鳩嗚乜乜乜】
去台灣，唔少朋友都一定排隊食芒果冰，香甜透心涼，確係消暑美食。芒果冰帶唔走，愛芒一族大可趁𠵱家台灣愛文芒當造，喺當地食個飽之餘仲可以帶啲返香港。南部有個為期一個月嘅「臺南國際芒果節」，好似費清呢啲芒果癡肯定吃瘋了。
紅皮芒果愛文芒（Irwin，圖）外形肥嘟嘟好鬼可愛，果肉肥厚，清甜多汁，係台南玉井嘅名物。所謂不時不食，7月係台南芒果最佳季節，芒果節以「夏日燑紅寶石」為主題，由本月27日至7月26日舉行，主場館走馬瀨農場有芒果主題館、愛文芒品嚐、芒果創意糕點等活動。成個月喺唔同場地都有活動，例如7月4日至5日玉井圓環旁就有芒果冰嘉年華，有免費芒果冰兌換券派發；7月18日至19日左鎮驛站有芒果烘焙嘉年華；7月25、26日喺楠西區江家古厝有芒果甜點嘉年華。
費清有啲朋友鍾意放一、兩日假，去台北閒逛度周末，唔去台南唔緊要，台北都有好多愛文芒買。不過提一下大家，台灣近來天氣熱力逼人，中午時分閒閒哋有35℃、36℃，今個月有10幾日超過35℃高溫，打破100年紀錄。料7、8月會更熱，去台灣食芒果之餘要防中暑，戴帽、開遮、多喝水呢啲基本動作唔少得。
費清
＃要生計，也要生活 ＃毋忘初衷