【訪問】
近年韓國服飾、網上代購等盛行，令I.T（999）經營備受挑戰。I.T市場推廣及國際業務副總裁鄭靜珊指，近期消費模式轉變令公司客源減少，但她認為時裝「永遠有個cycle」，只要公司「揀啱品牌」和做好服務，經營模式仍具競爭力。
記者：吳綺慧
去年I.T香港生意達36億元，按年保持平穩。不過作為消費者，不難察覺近年I.T減價「多咗又密咗」。去年I.T香港的賺錢能力明顯下滑，盈利按年倒退32%，利潤率由早年7%以上，降至去年度的3.9%。即每做100元生意，經營溢利只有約4元。
鄭靜珊坦言，近年韓風盛行，加上網上代購普及，目前逾四成生意來自國際代理品牌的I.T，的確面對客源減少的問題：「是很大挑戰，生意係難做咗。」不過鄭靜珊認為，雖然市場競爭加劇，但「百貨永遠有百客」，I.T是經得起考驗。「我地90年代創立izzue、b+ab，都試過生意唔好，每隔一陣同事就開始擔心：H&M嚟咗喇、Zara又嚟，Uniqlo平咁多……一開始港人可能會一窩蜂去買，但熱潮會過，其他衫亦唔會從此就無人要。」
鄭靜珊指，現時韓國衫、網上代購等為香港消費者的「新寵」，仍處於蜜月期，但時裝「永遠有個cycle」：「可能遲啲大家就會話，（韓國）東大門的衫來來去去款式差唔多，又或者質地「爭啲喎」；代購亦經常有size唔啱、錯款等問題。只要價錢唔係爭太遠，始終在舖頭買衫有得即刻拎走，係會開心啲。」
料租金續升 分店汰弱留強
面對潮流轉變，I.T近年亦引入不少新品牌應對，當中有韓國牌子。鄭靜珊表示，I.T堅持的策略是「保持對市場良好觸覺」，走多元化路線，讓客人有更多選擇，加強服務質素和顧客體驗：「例如店舖環境好靚、好舒服；售貨員服務好，有新貨又第一時間留畀你。要做好這些地方，讓客人心甘情願買你的牌子、會回頭。」今年零售市況艱難，鄭靜珊坦言目前經營仍「好辛苦」，由於歐元、日圓屢創歷史低位，公司要多做減價，以拉近與網購商品、水貨之間的價差。鄭靜珊預計，租金、人工等成本今年仍會上漲，目前的分店會「汰弱留強」，生意弱的會放棄，但如有合適位置仍會開舖，如近月在銅鑼灣翻新後的Fashion Walk，增設了3間新品牌分店。