【本報訊】「怪獸家長」以密集式興趣班催谷子女，但其實望子成龍並非只有這條路。來自公屋家庭、非傳統名校出身的19歲孖生兄弟，求學期間幾乎零補習和課外活動，只憑苦讀考獲獎學金，考進不少人夢寐以求的港大醫學院，二人深明基層病人叫天不應之苦，盼日後在公院為基層患者出一分力。
記者：鍾雅宜
大部份人以為庭家環境良好是讀醫的條件，這對孖生窮小子卻沒有因家境問題而不敢發夢。大哥葉泯君（Kelvin）和弟弟葉泯言（Oasis）與父母同住荃灣石圍角邨，一家生計靠當屋邨巴士司機、月入約2萬元的父親獨力支撐，小時候無機會參加課外活動或補習班，Oasis坦言有點羨慕同學「星期一學結他，星期二學彈琴」，但長大後便體會，課外活動應該以興趣為先，「好多人俾父母要求學呢樣學嗰樣，𠵱家都冇再學落去」。
Kelvin同樣與興趣班無緣，卻沒有感到不滿足，「其實自己都幾幸運，屋企夠食夠用，冇課外活動其實冇乜所謂」。
二人高中時曾因人報我報心態補習英文，卻認為作用不大。沒有興趣班催谷、頂尖名校作後盾，就讀荃灣公立何傳耀紀念小學和中學的小兄弟份外珍惜學習機會，靠互相幫助爭取好成績，「我哋考試前會問問題考對方，又會自製notes加深印象，文憑試時溫習中文就上網搵古文睇」。結果二人中小學期間幾乎年年考第一、二名。
高中當義工萌興趣
高中暑假時二人到醫院當義工，首次接觸病人，令他們萌起當醫生的念頭，Kelvin指：「嗰時面對唔少糖尿病同高血壓長者病人，想做醫生幫佢哋。」Oasis則喜歡研究人體結構，認為醫生「好似偵探咁，憑病徵找出病因」。
一次生病經驗更令Oasis立志要當醫生，「中六文憑試前夕突然因感冒菌入耳出現耳鳴，睇咗幾次私家醫生都冇用，因為醫藥費貴，惟有去公立醫院睇，等咗5、6小時先睇到醫生，感受到病嗰時叫天不應、叫地不聞嘅感覺」。
立志入公院助基層
二人曾擔心學費太貴與醫學院無緣，但去年Kelvin和Oasis分別在文憑試考獲40和38分，成功獲得港大首屆飛躍獎學金資助全數學費，終可圓醫生夢，曾探訪籠屋和劏房戶的他們深明醫療服務對基層的重要性，希望日後可在公立醫院當醫生，「公立醫院成日人手短缺，希望幫到就幫」。