WhatsApp短訊外洩風波震撼建制派陣營，到底立法會主席曾鈺成使唔使因為唔夠中立而要辭職？花生友覺得，似乎未必會。係就係泛民好似想同曾主席開拖，人力更話要向曾主席提不信任動議，但睇番泛民狙擊力度，似乎都留咗一手，可能因為曾鈺成始終係建制派中較為四正嘅人，而往績亦顯示佢其實都算中立嘅，可惜今次一鋪清袋，另有高人更話喎，如果曾主席退咗落嚟，後患可能仲大喎。
花生友當日聽泛民議員評論曾鈺成，對社民連長毛梁國雄嘅回應最深刻，因為佢批評今次曾鈺成做法時，補充一句話，第時邊個做主席呢？吾不欲觀之矣。
辭任主席後患無窮
由長毛呢句，其實可見佢睇到，曾鈺成辭任主席並非一定有好處喎。明眼人可見啦，曾鈺成喺過往任期始終算公道，有時更因為採取寬鬆裁決，而被同陣營盟友批鬥。有泛民私下都認㗎，接任阿曾做主席嘅，一定係建制派，仲肯定冇阿曾咁鬆手兼同泛民有偈傾，以後要搞拉布等抗爭，比起𠵱家肯定較大難度。
更大嘅影響係，𠵱家泛民同建制喺地方直選議席比較，係18對17，因為曾鈺成做主席而唔投票，所以可以當18對16。
但若然曾鈺成唔做主席可以投票，而湯家驊又辭埋職，就會變成17對17，又假若，建制派勝出稍後舉行嘅新東補選，又喺功能組別搵人做主席，言則建制派喺地區同功能組別都過半數，任何議員法案以至修改議事規則阻拉布，建制都會贏晒，怪唔之有泛民話狙擊曾鈺成都要睇定啲。
花生友