球星二代以前可能因為壓力大，好多都名大於實，不過近年似乎都有唔少「星二代」加入或者準備加入球壇，好似施丹囝囝盧卡，上月幫法國贏U17歐國盃，「萬人迷」碧咸兩個仔布魯克林同羅密歐都幾有足球天分。今次就輪到基斯坦奴朗拿度（C朗）嘞，佢同五歲囝囝小基斯坦奴，喺中美洲巴哈馬度假期間玩吓沙灘波，小C朗都好有乃父影子，我求大俠覺得皇馬應該快啲簽咗小C朗，慢慢等佢接班！
皇馬上季三大皆空，C朗自然成為被轟焦點，點都要離開吓馬德里呢個傷心地，近日就成家拉大隊去巴哈馬享受陽光與海灘玩親子樂，C朗踢咗成季波，梗係唔想再踢住，不過小基斯坦奴就好活躍，大玩沙灘足球。唔好以為小基斯坦奴只得五歲人仔，其實踢起波嚟有板有眼，又玩插花，又玩倒掛，拉弓勁射個姿態，同老竇似到十足十，連「插水」動作都抄埋，係爭咁啲肌肉，大個仔食番多啲嘢練大隻啲，隨時成為第二位大力金剛腿。
度假期間，C朗心情亦都好番啲，佢亦都打破對傳媒嘅封口令，接受咗葡萄牙《ABOLA》報訪問，C朗話：「之前一切有關我離開皇馬，對會長同教練不滿嘅新聞，全部都係老作，我喺馬德里好開心，皇馬係世界上最好嘅球會，我希望繼續幫球會爭取勝利。」
開金口講留隊宣言
C朗雖然澄清，但西班牙傳媒又點會咁輕易放過佢，西班牙一間電台就爆料，話C朗私底下打過電話畀隊友沙治奧拉莫斯，但內容就唔清楚。眾所周知拉莫斯呢期傳聞加盟曼聯，C朗就喺曼聯過檔，到底C朗幫皇馬留人，定係同拉莫斯介紹定曼徹斯特有咩好蒲點呢？
《馬卡報》就繼續離間C朗同新任教練賓尼迪斯，話肥賓新一季陣容中，有兩個球員係不可或缺，sorry，唔係C朗，反而係一對中場卻奧斯同莫迪歷喎，仲話佢哋兩個會成為中場領袖，咁C朗又係咩呢？
識睇，一定係睇足英台【英波Live】：
http://soccer.appledaily.com
http://bit.ly/engballlive