政改甩轆真係幕幕高潮，尤其田氏兄弟嘅互片，好睇到有如2015年《家變》。田北辰噚日話自己公還公、私還私，政改表決後，都有同阿哥坐埋食飯「仲有飲酒」，但會喺政改事上避重就輕。佢承認撰文批評阿哥嘅語氣可能較重，以後講嘢會修飾字眼。
但佢噚日被傳媒問到，田北俊力撐自由黨喺政改表決中冇做錯唔使道歉時，續批阿哥咁嘅態度難以令建制派團結，仲話「知恥近乎勇」，希望自由黨反省；至於阿哥喺facebook貼咗張豬相揶揄建制派議員，田北辰相信只係該黨青年黨團「傑作」，呼籲自由黨青年黨團做多啲有建設性嘅事喎。自由黨青年團主席李梓敬喺fb留言反駁：「所以，開會矇查查唔投票就係好有建設性嘅事情？欽敬欽敬。」