有網友噚日發現，有架車頂載有太陽能板嘅車喺公路上奔馳，質疑到底係咪合資格喺道路上行駛？過大欖隧道時又使唔使畀隧道費？政府新聞處其後喺facebook為大家解謎，原來網民捕獲到嘅太陽能車，係由香港專業教育學院（IVE）工程學科師生研發嘅太陽能電動車Sophie，佢哋早前向運輸署申請臨時牌照，趁天朗氣清嘅周日喺公路試行，由屯門IVE出發，途經尖沙嘴廣東道，以青衣IVE為終點，成段路程約一粒鐘。
大欖隧道公司則向傳媒證實，Sophie已獲運輸署發出臨時牌照，可以喺指定時間喺馬路行駛，同時以私家車規格畀隧道費，即係盛惠40蚊。新聞處仲派人全程直擊，留言：「見佢有紋有路，好似OK喎。話唔定過多幾年，成條街都會見到佢嘅蹤影！」