【本報訊】新沙士疫情反覆，進入暑期旺季，屬熱門之選的韓國團被迫全面叫停。專營韓國團的縱橫遊太子爺袁振寧卻早於政府公佈紅色旅遊警示前，率先取消韓國團兼退款，「既然擔心，不如停咗先」。接棒即遇日本3.11地震，轉搞韓國團又遇世紀疫潮，主修城市規劃的劍橋尖子，笑說人生只能見步行步。
記者：呂麗嬋
「自從轉做旅行社，最留意新聞，每日韓國有冇人死、有幾多新增個案，世衞去韓國有冇乜發現，分分鐘都要睇住」。他苦笑說，連同之前日本東北大地震、泰國紅衫軍、軍隊政變和韓國新沙士，每天看報，已成生活習慣。「希望9月復到團，早啲更好，做生意，點會唔志在？」新沙士席捲，香港人經歷過世紀疫潮，經驗豐富，韓國卻如白紙，隔離者自由出境、不公佈爆疫醫院名字，統統匪夷所思。
拍賣土產籌款送地震災區
「最初訊息好混亂，6月2日，個韓國人由香港過境去惠州，好恐慌，當時已通知前線同事，隨時叫停8至15號嘅團，點知當晚9點，已收到記者電話，索性公佈停團，之前計過數，退晒團費俾啲客，買番客人開心，當賣廣告都抵」。37歲的他好坦白。事實上，退團退錢，袁振寧從無手軟，勝在夠勇。2011年東北大地震，未夠一個月，他已獨闖災區仙台。
「地震前我正同東北7個縣政府洽談合作，準備月底喺香港開東北物產專門店，賣青森蘋果之類，原意係用特色食物帶動旅遊意欲，好多貨已經運抵香港，點知開幕前兩星期大地震」。籌備兩年的計劃，臨門滑鐵盧，他無怨天尤人，見招拆招將地震前購入的土產拍賣，籌得20多萬元善款，親自送到災區，「嗰時大仔先一歲幾，屋企人梗擔心」。袁不諱言，與很多香港人一樣，對日本有情意結。
「爸爸細佬都喺日本留學，以前細個爸爸去日本傾生意，我會跟埋去，未夠十歲，已去過幾十次」。日本人的紀律性和公德心，令他感動，「喺街度好多人排隊攞物資，但喺便利店，溫馨提示蒸餾水每人限買一支，真係無人搶購，呢樣嘢，只有日本人先做到」。袁家與日本的淵源，要追溯到半世紀前。
60年代，「大袁生」袁士強（袁振寧父親）是首批到日本留學的香港青年，1975年沖繩舉行世博，需大量繙譯及導遊，能操流利日語的袁士強，奉命做接待，其後獲賞識回流香港，開設首間專門代理日本機票的旅遊公司，「爸爸79年創立縱橫遊，與我同年出世，最初只做批發，不設門市，代理香港八成以上嘅日本機票，98年新機場落成，多機票供應，唔再係獨市生意，先做埋門市」。據說不少現時獨當一面人物都是出身自縱橫遊，原是導遊，其後自立門戶。
引進鐵道美食團開拓市場
有別新派兒子，袁士強作風低調，與前一哥曾蔭培是世交，所以前特首曾蔭權及不少政府高官，都是客仔。身為長子的袁振寧，說接棒只因父命難違，「03年回港，喺間交通顧問公司做嘢，港鐵、迪士尼同台灣高鐵，都係客人」，事業剛起步，父親卻叮囑回家幫手，「嗰時爸爸又未夠60歲，叫做有人教，唔使盲摸摸」。回流接棒，由單身貴族到成為兩子之父，他笑說自己的旅遊模式，也有大轉變。
「10年前，一年有3、40萬人去日本，大部份人參加旅行團，時至今日，90萬人去日本，七成自由行，好多人唔參加旅行團，因為覺得跟團辛苦，唔想咁早起身」。將心比己，他嘗試引入有自由行元素的旅行團，標榜「有幾日可以瞓晏啲」，又引進鐵道美食和祭典等特色團，開拓獨有市場，「競爭大，但個餅一樣做大咗，一年去5、6次旅行嘅人好多，惟有諗得刁鑽啲」。停辦韓國團不等於末日，拒絕坐以待斃的太子爺如是說。
