娛樂圈中有所謂金句王，即是藝人們說些很「玄」的說話，似是而非，或含哲理，或暗有嘲諷，其中以搞笑成份最多，表表者當然是黎明先生啦！他多年前的一句：「唔好空肚食早餐。」已成為經典了！小妹也認識一位在娛圈中頗為活躍的人物，我倆私交甚篤，他不時特立獨行，妙語連珠，我們稱之為金句王！這位仁兄個性詼諧，有他在，必定無冷場！他一直知道我的水腫很嚴重，而他又剛剛知道去水腫的妙法，便立即告訴給我：「喂，煲紅豆水啦，原來可以消腫㗎！我𠵱家日日煲畀老婆飲，當水咁飲就得㗎啦！」我突然插嘴問：「咁使唔使落糖呀？」他瞪着我說：「你？唔使落街㖭啦！」眾人笑到甩轆，此後，「唔使落街」便成為金句了！這位曾經自稱皇帝企鵝的寶貝，你估唔估到佢係邊個呢？估中冇獎！（哈哈！）
幕後「Cool魔」妙語爆發
另一位在娛圈當幕後的仁兄，花名叫「Cool魔」，他當然沒有張智霖般風流倜儻的俊臉，他又瘦削，又細粒，差不多連我也有機會重過他！平時cool cool的，不多說話，但當他一開口，就必定令我們捧腹大笑！他說的，大部份是順口溜，但每當小妹拍攝拍到筋疲力竭的時候，總會求Cool魔說些金句來讓我笑番醒的：「Cool魔、Cool魔，我好眼瞓呀，整句金句嚟畀我提吓神啦！」「好啦好啦……阿婆走得快，必定有古怪！」「點解呀？」「你幾時有見過阿婆走得快㗎？」「哈哈哈哈……又係喎！仲有冇呀？」「唉，我呢啲人，細個有書又唔讀，大個就喺度扮醒目！細個唔肯讀李白，我𠵱家咪變成『我黑』囉！」小妹登時笑到肚痛：「仲有冇？仲有冇？」「古古怪怪，帶波出界！」哈哈哈哈……Cool魔似乎越講越順囗：「着觀奇，等收皮！」「吖，仲有一句，阿妹你唔知受唔受到：『不在乎經血流走，只在乎綿條正斗！』」「嘩，你幫人賣廣告呀？廣告公司應該搵你做創作主任喎！」真感謝Cool魔往往在小妺拍攝拍到得番半條人命時教我學了不少「鼓勵性的金句」，唔係？分分鐘又要入醫院了！
柴娃娃揸車睇楓葉
另外，在多倫多讀書時，也有不少很搞笑的同學仔（當然，自己亦是其中一分子）有一次大家趁着紅葉盛放的時節，一早駕着七人車去亞岡群省立公園看楓葉，車程要兩個半小時，本來說好分三人輪流負責做司機，但除了司機阿John外，其他人都睡着了，進入公園範圍時，見到漫山遍野的紅葉，阿John立即叫醒我們，車內嘩聲四起，真的太漂亮了！那種色彩之濃艷，視野之遼闊，真的筆墨不能形容。我們便開始埋怨阿John：「做乜唔早啲叫醒我哋呀？可以影多啲相吖嘛！」阿John很隨意的回答：「因為我都瞓着咗，一醒就見到呢個環境了！」全車立即鴉雀無聲，吓？司機竟然瞓着咗？跟着各人大笑，追打阿John，都不知他說的是真是假，總之回程時再不用他揸車了，甚至以後都不用了！但他那句：「我都瞓着咗！」便成為同學間的金句了！
是不是金句王並不重要，能夠娛人娛己，大家開心才是最重要！
風人院
撰文：杜如風
旅遊節目：《流行東京1,2》阿四，《風行全世界1-5》幕後黑手，《流行首爾》 眾矢之的。著作：《風行系列1-7》
本欄逢周日刊登
