熱開有條路，第七場由摩廐「飛來猛」大熱捧盃後，到了第八場三班千二米，都係開最重磅之1號馬熱win，此場冠軍騎師潘頓夥拍蘇廐「點解」後上一攻而破，收韁贏兩個半身位，3.6倍次熱門輕鬆完成今季三捷，投蘇廐後六戰三勝三位全上名，蘇保羅繼禮拜三晚以「連利之星」食尾糊後再建一功，臨近煞科馬房重現強勢。
「點解」馬主香港飛馬團體季內馬運亨通，成員之一才女兼前馬王「軍事出擊」馬主梁芷珊近期喜事重重，剛啱做咗香港足球總會董事，又憑「點解」贏馬，加上周一（29日）是她47歲生日，可謂三喜臨門。除了梁芷珊外，另一馬主黃婉曼老公馮柏基亦有到場拉頭馬。
潘頓今日開場後一直食白果，完全零上名，今場一嚟料即贏，今季頭馬上到90場，雖然肯定追唔到雷神，但就仲有希望連續第二季贏過百場頭馬。
今場二至四名由最大冧巴三駒包辦，順序係10號「又襟又準」、12號「芙蓉之寶」及11號「鑽飾傳奇」四重彩派十二萬九千幾。