阿仙奴買施治、放奧斯賓拿幾乎成定局，但唔知雲格睇完上周五場美洲盃後，會唔會改變主意，叫停轉會，然後同大家講「最強之人已在陣中」？上周五場美洲盃八強，雖然哥倫比亞被阿根廷踢出局，但哥國門將奧斯賓拿表現神勇，使出兩連撲，連美斯同阿古路兩大射手都冇符。
傳施治周一入「廠」
好多英媒都話，阿仙奴已經簽到車路士嘅捷克門將施治，最新消息話，施治喺上周五已完成體測，預計交易喺星期一正式落實。作為上季阿仙奴正選門將，奧斯賓拿肯定好無奈，佢下半季表現非常好，冇大失誤，仲幫球隊捧英足盃，但都要將正選讓畀施治。有傳土超嘅費倫巴治想搵奧斯賓拿，前兩日佢喺美洲盃嘅記招都確認呢個消息，「係，我經理人同佢哋傾緊，但係我𠵱家心入面只有哥倫比亞。」
阿根廷贏12碼入四強
我求大俠覺得，1米83嘅奧斯賓拿除咗唔夠施治高之外，其他方面都唔輸蝕，喺反應方面就更加一絕。上周五對阿根廷場波，奧斯賓拿好似城牆一樣，阿根廷攻極都射唔入哥倫比亞。喺上半場，阿古路接應傳中，第一時間近門一射，奧斯賓拿簡直神一樣嘅反應，用腳擋出，但之後仲精采！美斯後上衝頂執雞，奧斯賓拿竟然可以即刻用手擋出，技驚四座！
喺下半場，奧斯賓拿仲有表演機會，飛身撲出奧達文迪嘅攻門，個波再中柱彈出。奧斯賓拿成場波七次撲救，係哥倫比亞能夠守和阿根廷0:0嘅頭號功臣，可惜有班炒飛機嘅豬隊友，搞到球隊出局。由於冇加時，兩隊直接射12碼分勝負。喺頭五輪，哥倫比亞有路爾斯梅利爾飛機，兩隊踢成4:4，而喺第六輪，兩隊又一齊射失，到第七輪，哥軍嘅謝臣梅里路又炒高，而剛落實重返小保加嘅泰維斯就幫阿根廷射入，最後阿軍以5:4晉級，打入四強。
呢場焦點除咗奧斯賓拿，仲有美斯。雖然佢又冇波入，但全場好有威脅，哥倫比亞球員基本上靠犯規先阻到佢，難怪佢賽後當選最佳球員。
識睇，一定係睇足英台【英波Live】：
http://soccer.appledaily.com
http://bit.ly/engballlive