昨日講「秘密露底」，因篇幅所限，還講漏一件，就是建制派已將自由黨排除出外，唔當自由黨係自己人。喺一個酒會中，一位商界老友談及，葉國謙帶人走出會場之前，並無通知自由黨，自由黨田北俊當然有指出呢一點，為何田北辰唔叫埋大佬離場？唉，輪唔到佢話事吖嘛，兄弟都唔可以溝通，入了黨，就要犧牲親情！點解唔駛叫埋自由黨5位議員離場？條數好易計，一早知道有28票反對，加埋自由黨5票（贊成），就一共有33人留在議事堂，根本唔夠半數，主席可以宣佈暫時休會（記得嘛，電視鏡頭錄到曾鈺成問咗秘書兩三次：數人，數人！）點知道田北辰筆下之船長（不知是葉國謙還是林健鋒）突然叫唔郁陳婉嫻、林大輝、陳健波與潘兆平四位，於是有33加4等於37人留在會內，立法會秘書通知曾鈺成夠37人，咪按程序投票囉。
不理自由黨於前，田北辰批判田北俊於後，相信自由黨以後要自己搵食，做真正中間派。一位自由黨議員恥笑建制派唔掂：「其實我地都知到田少人在場外，要等埋佢，一早預定，如果佢在指定時間內還未到場，我就會企起身講番半個鐘頭，拖延時間等埋田少入嚟，林健鋒佢地唔識呢招咩？謝偉俊，麥美娟其實一早準備咗發言稿啦，有人叫佢地唔駛講之嘛！」
如此陰差陽錯，等埋發叔，於是變成笑一世。有人埋怨曾鈺成食咗幾十年國家奶水，在緊急關頭突然唔識打合法茅波，吹黑哨，仲懶公正咁禁止林健鋒提出休會十五分鐘，直情係吃裏扒外。民建聯又真係慘情，受黨培養支持二十年以上，為回歸參政做預備軍，點知除咗曾鈺成一位有型有款有料到之外，其餘全是劉阿斗，枉吃皇糧，但我地多啲讚曾鈺成好嘢，佢可能越受內部批評，還是不講為妙。一位議員講及四月、五月、六月十七日之前，不少歐盟國家駐港代表，領事約見議員，口徑一致，都係贊成「袋住先」，叫議員投贊成票。一位議員甚至去到杜拜，都有中東官員認為「袋住先」最好。佢好奇怪點解啲外國勢力，英美勢力突然一致同意袋住先？梁特與中聯辦唔係一路宣傳提防外國勢力嘅咩？或者因為如此，凡是敵人擁護的，我們就要反對，外國勢力認同831方案，不知有何圖謀，故此最後關頭，中央係要達成一個目的，由立法會否決政改方案喎。