【本報訊】酒樓食肆鬧人手荒，為解決人手問題，過去靠俗稱「蛇頭」的中介人，轉介有經驗的從業員炒散當臨時工。網絡年代，最近出現網上蛇頭，設fb專頁提供餐飲業炒散資訊，吸引一批90後、大專生入行炒散。有90後稱「返工時間夠彈性，遷就我返學」；酒樓食肆負責人大讚「呢班90後有禮貌，又肯做，仲幫啲客拉埋凳」。
記者：蔡朗清
酒樓侍應90後Yuki，近月因夜間進修讀英文辭工，轉做兼職，經網上蛇頭介紹在利苑炒散；她說，以前酒樓炒散經傳統蛇頭安排，但時間地點欠彈性，經常告吹，最近出現網上中介公司提供食肆兼職資訊，「透明度好高，講明幾錢，邊度返工」。而且有較高主動權，「我想邊日返工，係咩地區返工，我WhatsApp畀網上蛇頭，對方即刻覆得唔得，唔使等，一部手機搞掂。𠵱家成班90後都搵網上蛇頭做蛇仔（臨時工）」。
食肆負責人讚有禮貌
文鼎壹號餐飲經理梁志磊表示，最低工資實施後，聘請員工越趨困難，樓面、清碗等長期缺人，經勞工處招聘一直沒回音，透過傳統蛇頭找兼職，「搵5個得兩個，唔夠人我自己做埋洗碗、吸塵」。他上月首次嘗試經網上蛇頭請散工，「好驚喜，要幾多個有幾多個，仲隨傳隨到」。蛇仔有不少是90後大專生，「佢哋有禮貌，識得同啲客拉凳」。經一個月試用，酒樓決定棄用傳統蛇頭，改為網上蛇頭，「手續費仲平咗」。
負責人Lisa於去年12月在fb成立「炒散易」專頁，推出近大半年已有70多間中西日食肆參加，包括高級食府及酒店等，如利苑、文鼎壹號、和田日本料理、皇冠假日酒店，職位有樓面、廚房、洗碗等；登記兼職人數逾千人，不乏大專生找兼職，也有白領搵外快。
她表示，因應年輕人上網習慣，故推出網上中介平台，方便勞資雙方，因容易配對工作，反應不俗，「我哋會按求職者資歷、居住地等配對；或者已做開某間食肆就會優先考慮，食肆就唔使再教多次；求職者又可主動WhatsApp邊段時間炒散，我哋幫佢配對」。餐飲聯業協會會長黃家和表示，酒樓食肆長期欠人手約10%，「𠵱家90後唔想做長工，彈性工啱佢哋，使晒錢又做過」。
