過去當股市跌幅達20%就會被界定為進入熊市，截至上周五收市，由高位起計，內地滬綜指已經插咗19%、深證成指20%、創業板27%。但由於有中國特色的股票市場係唔會照搬西方一套準則，如無意外將會有官方媒體表示呢隻係慢牛、改革牛、新常態牛……總之唔係熊唔係鹿唔係其他動物。
事實上，個人亦傾向相信內地股市再大跌空間有限，《人民日報》4月21日大大隻字寫住「4000點才是A股牛市開端」，等於叫國民入場，如果一個屈尾十插到3000點點搞？近一個禮拜呢種跌法，係斬倉式急插。A股場外融資可以去到五倍，即係暗啞底做嘅孖展。一隻股票假如持倉市值100萬元，5倍場外融資，其本金20萬元，融資維持率就係125%。一般證券行正常融資維持率係做200%或166%，當插到120%已經要你補倉，補唔到就斬倉。原理上就係只可以客蝕，自己唔可以蝕入肉。所以場外融資咁高槓桿時，最盡兩下跌停板已經會直接斬倉。早前股市一急跌官媒就會出嚟唱好，而近一個星期都冇，似乎要焗場外融資斬晒倉先。
其次，早前本欄提及「股市山雨欲來」（ http://hk.apple.nextmedia.com/financeestate/art/20150517/19150001），多國股市同時間三花聚頂再破位向下殺，各國債息亦一齊急扯，呢種情況宜退避三舍。部份亞洲國家股市已跌咗一大段，有短期見底迹象，但唔代表會立即再展開升勢。同樣，A股殺落嚟後可能會有反彈，但唔代表立即會再展開新一輪升勢。各國同步三花聚頂再插嘅情況，就算見底閒閒哋都要三幾個月盤整，其間會彈、會插、會盤，但冇升勢。所以不妨唞下暑，或要玩都細注啲，寧願等個勢明確先再入場。內地經濟數據非常差，只剩下股市用嚟顯示未死得住，所以跌得深就會托。但有時大趨勢不以人為意志轉移，此段期間不如等股市盤整，再觀察究竟係隻披住牛皮嘅熊定披住熊皮嘅牛。
Mr.Tregunter