除了一班迷你兵團由配角變為主角之外，不少動畫當中，都會出現十分搶鏡的配角，甚至如迷你兵一樣升呢成為主角，爆紅程度足以揮低片中主角。
《荒失失企鵝》（Penguins of Madagascar）
由夢工場炮製的動畫《荒失失奇兵》（Madagascar），2005年上映第一部，獅子、長頸鹿、河馬一大班騎呢動物鬥搞笑，不過，當中四隻經常扮勁但又論論盡盡的配角企鵝，竟然大受歡迎，結果，這幾隻企鵝就坐正變成主角，於去年推出電影《荒失失企鵝》，今次他們被奸人所害，要再次歷險。
《無敵貓劍俠》（Puss in Boots）
亦是由夢工場炮製的動畫，早於2001年開始的《史力加》（Shrek）系列中現身，最經典的是牠以一對水汪汪大眼睛來冧敵人，令觀眾對牠一見鍾情。結果，於2011年貓劍俠終於坐正，拍攝以牠為主角的動畫，片中貓劍俠除了十分威武之外，更有貓貓平時的特性，令愛貓人士睇得開心，大收旺場。