還有半個月便唞暑，今季所有級際賽已完結，但應屆香港經典一哩賽盟主「美麗大師」卻唔休息，這天出來試大閘，莫非貪得意嫌隻馬太舒服乎？練馬師告東尼當然唔會死錯人啦！睇番賽程，7月12日煞科日有場90至115分一班田草1600米賽事，啱晒106分嘅「美麗大師」跑，九成九會報名，所以先至撻課大閘，臨唞暑都要谷一谷佢嘅狀態。
睇番「美麗大師」喺這天第一組1200米泥閘之表現，在郭能胯下留前鬥後，直路在外檔衝，點到即止，追落有反應但唔算太唔勁得第四，季尾有咁嘅水準其實算唔錯。而呢組跑第一名，就係由賀廐轉投告東尼後仍未上陣的「大威力」，末段步伐相當凌厲，呢輪佢不斷辣操，月中亦試過谷草閘，狀態火速冒升中，睇怕會喺唞暑前轉倉初出爭功。
至於「美麗大師」，上仗同程1600米排最外檔，全程外叠蝕到阿媽都唔認得，依然後上如飛得第五只輸約兩身位。以佢嘅一哩分量，只要屆時檔位唔太差，絕對有力收復失地。