荔園係唔少香港人嘅集體回憶，噚日荔園喺中環復活，好多城中名人都有出席開幕禮，包括特首梁振英同前特首夫人董太。荔園成功復活，邱德根家族成員就晒冷撐場，邱德根幼子邱達根致辭時忍唔住感觸落淚，話希望新荔園繼續帶畀香港人歡樂。
梁振英話喺荔園有唔少童年回憶，細個嗰陣要成績好，先敢求父母帶佢去一次玩。咁到底齊昕又有冇去過荔園呢？梁振英話帶過啲仔女搭港鐵去荔園玩機動遊戲，佢自己就好記得大象天奴咁話。又即場試掟假香蕉餵機械天奴，足足掟咗4次先成功，天奴隨即發出叫聲兼噴水。梁振英又同商務及經濟發展局局長蘇錦樑一齊玩經典嘅「掟階磚」，但都係要掟咗3次先成功。