徐小鳳、謝安琪（Kay）昨日以嘉賓身份出席荔園在中環海濱正式重開的開幕活動，Kay更在活動唱了主題曲《最初的快樂》，張立基、麥翠嫻及黎燕珊等亦有現身。有傳曾經在荔園唱歌的小鳳姐「出山」支持，她接受訪問時表示：「從來未在荔園演出過，不過以前成日約朋友嚟玩，有玩碰碰車、掟吓香口膠，嗰時中啲唔中啲，冇可能次次中，呢啲都係我哋嘅集體回憶。」問到小鳳姐勾起了甚麼回憶？她大讚：「通常諗番起歡樂時光，今日會同啲朋友行過圈，聽到荔園重開，係香港人嘅美麗回憶。」記者問到小鳳姐當時是否因為少娛樂才來荔園？她表示：「都唔係，荔園係最高娛樂。」
「爹哋掟香口膠好叻」
Kay自言是70、80年代的荔園粉絲：「爹哋有帶我去荔園玩，不過我唔夠膽玩鬼屋，但就有坐碰碰車，爹哋掟香口膠好叻，成日都掟到俾我，我好崇拜我爸爸。」至於會否帶囝囝到荔園玩，她表示：「想叫公公帶佢嚟，等佢崇拜吓公公，有埋張繼聰就好啲，因為佢好快就可以掟好多禮物返嚟，𠵱家囝囝間房都放滿公仔，最大嘅公仔有半個人咁高。」Kay透露趁暑假會全家總動員去旅行，她表示：「會同爹哋媽咪老爺奶奶一齊去，地點會由小朋友揀，佢通常會揀啲有樂園嘅地方。」
此外，張崇基與太太前日帶同3歲的囝囝Kristopher到荔園試玩，其間Kristopher獨自玩鞦韆驚慌大喊，更被爸爸取笑，最後要由媽媽陪坐咖啡杯𠱁番，一家三口更逐一在各個景點影相留念。
採訪：張俊銘、梁繼光
攝影：仇志德、羅德光