立法會主席曾鈺成因為建制派WhatsApp外洩，成為外界追擊目標，政圈陰謀論將事件同曾主席一直被視為特首人選之一拉上關係，而另一個傳聞中可以做特首嘅人選、財政司司長曾俊華，開始有政界中人關注，佢會唔會係下一個中箭目標。
政圈好事之徒同八方講，鬍鬚曾下周日前去北京，以中國代表團成員身份出席周一舉行嘅《亞洲基礎設施投資銀行協定》簽署儀式同特別財長會議，其間仲會同中央政府相關官員會面。該好事之徒話，香港政改之後仍然多事，鬍鬚曾今次又見中央官員，原本好正常，但難免引起某啲人「關注」，「例如係咪面試、又或中央向佢收風」，再加埋曾主席突然中箭，下個到鬍鬚曾，真係唔出奇！