繼《大時代》後，大台近期重播26年前1989年周星馳的《他來自江湖》，前馬王「軍事出擊」馬主梁芷珊當時有份參演，飾演文忠信(黃秋生)的同居女友兼時裝店老闆娘林美琪。
梁芷珊表示平日很少睇劇集，但今次會「煲」晒齣《他來自江湖》，她話當年拍攝時仍未畢業，兼職模特兒，只客串一個小角色，謙稱不知演戲為何物，冇演戲天份，有自知之明之後再冇拍劇，《他來自江湖》係佢處女作亦係唯一一次，笑言家陣睇番自己演出都流晒汗。
講番梁芷珊，佢剛當選足總董事，如果周六(27日)賽事兩匹名下團體馬「點解」和「競技英雄」有好成績，咁就雙喜臨門咯！
梁芷珊透露近日入倉探「點解」和「競技英雄」，兩駒都精神奕奕，佢曾話「競技英雄」是躁底，向來粗粗魯魯忟忟憎憎，郁啲就發嬲，當日馬兒不停反耳，有人行過會嬲，餵牠食紅蘿蔔又嬲，乜都嬲仲想咬人。梁芷珊笑言可能佢當日曾為馬兒之頭髮，整咗條中間界「美人啄」，「競技英雄」唔鍾意故發脾氣，不過隻馬主要係對其他人躁，卻認得女主人，對梁芷珊尚算溫柔。梁芷珊指「競技英雄」大大隻夠壯可負重磅，今仗落番三班跑季初贏過嘅1400米，有一定機會。
至於「點解」，轉蘇廐後5戰2冠1亞2季，大熟大勇，今場爭最擅長之田草1200米，仲要排2檔，當然是爭勝要角。