立法會內務委員會主席梁君彥噚日主持會議時，特別宣佈兩項特別事項，第一件係副主席湯家驊下個星期因事，唔會出席內會，所以噚日係佢最後一次用內會副主席身份出席會議，所以提早歡送佢。梁君彥代表咁多位議員多謝湯大狀3年來的貢獻，又問湯大狀有無嘢想分享。
湯家驊聽到議員突然搞歡送，一度感到驚訝，似乎佢自己都唔知噚日係最後一次開內會，唔知係咪太突然，或者怕又激動流淚，所以擰擰頭冇嘢分享，一班議員則按傳統拍枱向湯家驊致謝，梁君彥又講笑話，其實佢仲勸緊湯大狀唔好辭職，10月1日前仍可以隨時攞番封辭職信，繼續做內會副主席。
至於另一特別事項，就係法律顧問馬耀添噚日最後一次出席內會，梁君彥話多謝佢多年來為內會提供專業法律服務，馬耀添就話多謝主席同議員，再於休會時同一班立法會同事合照留念。