黃曉明老婆Angelababy昨早在微博晒出一對「唔乾淨」嘅手，確係雙手都藏晒黑邊，Baby留言：「最近拍的戲都有一雙洗不乾淨的手，說好的偶像包袱呢？」原來Baby係因為工作，搞到對手咁！未知有「潔癖」嘅劉浩龍，見到呢對手會唔會又食唔落嘢呢?
一直星運平平嘅「師兄」劉浩龍，早前爆出「污糟手論」引起網民熱話。事緣劉浩龍今個月初去咗食麵，忽然見到坐喺佢對面嗰位食客雙手污糟，又話自己嘗試食多三啖，但最後佢話堅持唔到，宣佈投降嗌「走」，結果被網民批評佢睇唔起基層，後嚟知衰嘅師兄就回應，稱自己有潔癖，見到污糟嘢會有少少敏感，又話冇意思去貶低一啲勞動朋友工作。佢女友容祖兒(Joey)日前出席活動，亦講男友劉浩龍已因為錯失而自責，希望大家盡快原諒。