《蘋果日報》前晚破天荒被點名可以入去中聯辦採訪，連唔少行家都嘖嘖稱奇。其實除咗《蘋果》之外，連「橙」都有份，八方講緊就係一間叫做「橙新聞」嘅媒體，而且佢哋仲係第一間被點名嘅媒體，排名仲前過第二嘅《文匯報》㖭呀。
唔知大家有冇聽過呢間「橙」呢？其實《壹週刊》喺4月披露過，「橙」係由中聯辦喺舊年低調透過聯合集團成立嘅網媒。
據報𠵱家「橙」仲係處於試業階段，但係已經專訪過立法會主席曾鈺成、新民黨葉劉淑儀，仲有前港區人大吳康民、幫港出聲召集人鄭赤琰幫手寫專欄，咁大家明白「橙」係乜嘢來頭，點解西環將佢排先過《文匯報》啦。