建制派內有無間道，大爆佢哋同埋港區人大嘅絕密WhatsApp群組短訊紀錄，搞到佢哋一時間人人自危，就好似新民黨葉劉淑儀咁，雖然佢噚日冇去估邊個係鬼，不過就騷自己兩部手機出嚟，證明自己唔係鬼。
葉劉為咗證明自己係無辜嘅，噚日佢就使出撒手鐧，先拎出佢部黑莓手機出嚟畀大家睇，佢冇用WhatsApp㗎。八方瞄一瞄，見到明明裝咗WhatsApp喎，葉劉就開個app畀八方睇。點知一開個app就顯示，個app版本太舊同埋已經冇運作，所以要更新。葉劉就順勢仲埋怨電話公司嗰邊搞極都搞唔掂，所以佢咪好幾個月冇用過囉。八方記得葉劉有兩部電話嘅，佢就拎埋另一部爆芒古董手提，仲形容呢部係「低智能」電話，只係用嚟接記者電話箒，再度力證自己冇用WhatsApp。