建制派因為政改表決甩轆要到西環「面聖」飲夜茶前夕，博客「何艷金」就貼咗張西環晚宴12道佳餚贈興（圖），保證建制派議員個個食到背脊骨落。
頭盤有「大龍鳳泡湯」同「33件愚豬拼盤」，八方諗起都開胃；主菜「京燒大把掌」、「發粟池魚羹」，加上名貴菜色「八頭鮑乙位」、「蔘盅有翅」同「生煎大蝦碌」，相信越食越要添食。之後嘅「氣鍋炸粉絲」、「有緣再燴無酲雞」、「金雲大鑊飯」同「爺爺黑燥麵」，相信令大家飽到上心口。
由於中聯辦主任張曉明對政改都「太上心」，相信菜式一定落足火喉，一班建制派議員唔使等埋發叔，就可以GOGOGO放心食，食到肚脹就提早離場，唔使「鄭重道歉」、「遺憾」或者「請見諒」，但要小心眼闊肚窄或令腸胃「反應好大」。