英格蘭班大國腳向來名大於實，估唔到連班細嘅都係咁。前晚英格蘭U21喺U21歐國盃B組最後一輪分組賽對意大利U21，只要唔輸都有機會入四強，點知踢唔夠半粒鐘就落後0:2，最後輸1:3，以三戰得三分包尾出局，葡萄牙U21同瑞典U21攞到小組一、二名，將會喺四強分別鬥德國U21同丹麥U21。
卡尼零入球名大於實
幼獅有哈利卡尼、丹尼艾格斯同贊堅臣等英超球員壓陣，人腳其實唔錯，賽前仲以5.5倍成奪冠第三熱門，家陣搞到咁尷尬做咗小組包尾大幡，英國有傳媒即刻將隻鑊推畀領隊修夫基，話佢喺2011年接手幼獅前成四年冇嘢撈，幼獅由個咁冇料嘅主帥嚟領軍，想攞到好成績都難；雖則修夫基俾人狂插，但佢仲希望可以留任。但我求大俠認為，幼獅班球員都要好好反省，尤其係一球都入唔到嘅卡尼；之前吹到曼聯想出4,000萬鎊買佢，唔知雲高爾睇完佢喺U21嘅表現後，仲係咪咁諗呢？幼獅喺U21歐國盃提早執包袱返家鄉，英格蘭想挽回面子，惟有寄望幼獅班師姐可以喺禮拜六成功淘汰加拿大女足入女子世盃四強啦！
識睇，一定係睇足英台【英波Live】：
http://soccer.appledaily.com
http://bit.ly/engballlive