過往陳奕迅的專輯，離不開林夕和黃偉文兩位詞神的作品，但下月推出的新碟《準備中》，卻由袁兩半包辦全碟歌詞，Eason說：「我想特別提嘅一隻歌係《人生馬拉松》，唔知係咪填詞人留意到我太太鍾意跑步，咁啱佢用馬拉松比喻人生，首歌好正好勵志，簡單歌詞，好有意思。」
第一首主打歌《無條件》由Eric Kwok作曲，Eason說：「上年2月聽到呢隻歌，好聽喎，我覺得不如講無條件嘅愛，狗仔對人類嘅愛真係無條件，我諗如果擺喺人度有冇呢？如父母對子女、情侶、兄弟姊妹，我同Eric都覺得係有嘅，搵袁兩半成隻碟寫晒，佢人生經歷豐富。另外謝霆鋒又有份作曲，求咗佢好耐，佢先交到歌，佢啲歌有自己風格，我覺得幾有趣。」
問點睇填詞界來去只有林夕和黃偉文？Eason說：「林夕同阿Y已經越填越少，其他如陳詠謙、林寶、梁柏堅、周禮茂、小克、周博賢、周耀輝、潘源良啦，都好多人㗎，呢排係陳詠謙紅，仲做埋歌手㖭，佢畀我聽過《告白》，我有畀意見，第一句咬字係咪要清楚啲？因為音比較沉。」
