《蘋果日報》記者要返內地做嘢係天方夜譚，其實喺香港有個地方係八方同其他同事「禁地」，就係中聯辦。但《蘋果》記者噚日卻史無前例、光明正大，獲點名大搖大擺入西環。
噚晚建制派去西環飲夜茶，八方同行家一早喺西環門口等。平時呢啲狀況，八方同行家一樣，只係影吓啲車出車入、裝吓有邊位建制派現身。點知噚日班建制派入晒去之後，突然有西環職員招呼記者入去大堂，講明每間電子傳媒可以畀三個人入、報館就兩個，同埋只有被點名嘅先可以入。《蘋果》記者心諗梗係冇份，點知讀到第6間竟係《蘋果》，在場人士無不譁然，而且西環仲喺大堂放咗水同餅乾招待記者，《蘋果》中人對西環突解禁受寵若「驚」。西環保安仲搞笑，主動話「動新聞」同報紙傳媒都只當同一機構，唔通係「動新聞」粉絲？