立法會否決831政改方案之後，香港社會氣氛表面上反趨緩和，乜唔係啫，31名建制派議員在民建聯葉國謙領頭下，投票前最後一刻離開議事廳，變成轟動國際大笑話，香港人笑到碌地，令呢31名議員只係識喊，抬不起頭來。咁荒謬處境喜劇在幾百萬人睇住之下，分場上演，好睇過「殺破狼」，香港人是善良的，笑一餐就會忘記好多非私人恩怨，大家返回原來崗位辦事、上學，家庭因政見不同而對立之現象，慢慢會消失。
普通市民笑得落，笑餐飽啫，政治人物就唔係咁輕鬆，泛民老早分裂咗，分激進派、中間派、溫和派三大類，中間派之湯家驊還宣佈退出公民黨，佢係傾向與北京談判妥協之人，但在政壇冇乜影響力，又冇追隨者，相信退出公民黨後，以後會被逼逐漸淡出，邊緣化，以至消失。
建制派方面，麻煩大咯，中環建制派人士，或接近建制派消息人士現時流行一個新講法，就是中央根本唔想831政改方案通過，現由泛民聯手否決，就係求仁得仁，過往之激烈爭辯，林鄭三人政改小組猛講「一定要得」，只係做場大戲而已，泛民投票反對，正中下懷，建制派31人離場，不影響原來嘅大計，根本冇乜所謂。
中央咁鬼醒，一早計算晒咯喎，屬信不信由你嗰類。但有人搵出一啲旁證，堅持推倒831方案，係中央計算之中。據說林鄭月娥帶泛民議員上深圳與李飛、王光亞見面之前，曾強烈暗示中央會優化方案，有若干讓步，等泛民有少少下台階，故此泛民議員先至上深圳。誰知見面之後，李飛、王光亞、張曉明完全冇表示，原先估計已寫好之一兩段「讓步講詞」都失咗蹤，令林鄭三人組為之愕然。消息人士話，深圳安撫大會變成批鬥泛民大會，令泛民議員非常冇癮，邊度會轉彎吖。好嘞，立法會果然在31名建制派議員缺席之後以28票對8票否決，梁振英直情神色自若，表現輕鬆，6月18日黃昏到文華東方酒店出席主持李達三博士捐贈一億元俾中文大學嘅儀式，不少出席人士盛讚梁特EQ高，「受重大政治挫敗」之後，一啲失望之情都見唔到，第二日仲立即見記者宣佈調動財委會議程，創科局撥款議案讓路，展現平和笑容，似發自心裏，唔係裝出嚟嘅。有此種種跡象，建制派大可振振有辭：阿爺贏晒，輸了投票，贏了結果，完全在掌握之中！