尼馬影子、巴西新星羅拔圖法明奴值唔值2,900萬鎊，要踢過英超至知，不過紅軍暫時係入貨最多嘅英超球會，可見領隊羅渣士（圖）幾咁焦急。
紅軍人最念舊，但大隊長謝拉特真的走了，未來更不一樣。正如費格遜離開曼聯，看看現時紅魔鬼組軍方針，不能說雜亂無章，但都係頭痛醫頭，腳痛醫腳，人來人往；連走下坡嘅29歲沙治奧拉莫斯都想用3,500萬鎊從皇馬撬過來，為挽留迪基亞同對方鬥氣，費格遜仲喺度，唔會咁儍啩。
咁曾經係紅軍希望嘅羅渣士呢？上季用咗1.15億鎊擴軍代「咬人蘇」，據著名網站transfermarket.co.uk紀錄，總計有錢交收嘅買賣，「九入八出」，淨支出高達4,600萬鎊；羅帥仲係1959年以來，第一位教咗三年都仲未有盃落袋嘅紅軍領隊。作為英超頂級球會之一，錢絕對花得起，因為紅軍去季單係收電視轉播同聯賽會筆獎金，已逾9,200萬鎊，比冠軍車仔只係少700萬鎊；但球會煞科戰竟然輸畀主場嘅史篤城1:6，羅帥成個暑假孭住呢隻鑊，唔怪得俾英國莊家，列為首位被炒英超領隊嘅次熱（大熱係有個不肖子嘅李斯特城領隊皮亞臣）。
紅軍上季新兵，以該會購入價排第七、只花掉約1,000萬鎊嘅德國小國腳安利簡恩表現最好，可塑性高，前中後三線都識踢，係球隊季中去年12月中起兩個月計，保持18場不敗嘅主要元素，價廉也可物美。眼見嚟緊季初賽程極難踢（頭五場包括作客史篤城、阿仙奴同曼聯），羅帥盡地一煲，快手簽入五將，淨支出暫時已達3,500萬鎊；法明奴話晒係尼馬替身，適合中前場多個位置，喺德甲數據又靚仔，貴得有理。
英超歷來10大巴西貴價兵，除咗車仔嗰班，表現多數好一般，包括以往曼城嘅羅賓奴同祖奧，現役嘅費蘭甸奴、曼聯嘅舊將路爾斯安達臣同準備離開熱刺嘅荷西保連奴；不過睇番英意西三地，頂級聯賽去季嘅三甲射手，南美人俱各佔兩席（車仔迪亞高哥斯達出生巴西），數據強勁。記得去年雲格曾講過，南美人熱爆歐洲球壇，皆因歐洲街頭足球已消失，相反背景刻苦的南美人，早年反而能練得一身好「武功」；英超嘅南美射手阿古路同阿歷斯山齊士都係窮苦出身。法明奴生於小城市馬塞約，父親當年喺街邊買樽裝水為生，佢自己19歲已遠走德國搵食；雖然喺賀芬咸冇機會踢過歐洲賽，但潛藏未盡露，唔使3,000萬鎊，羅帥搵南美人保飯碗博得過。
史達寧無謂再想，再想起未紅先醉瞓街頭嘅阿士東維拉新星基亞利殊，同啱啱包尾出局嘅英格蘭U21幼獅，信呢班英超年輕土炮，嘥氣！
波神