噚日最爆嘅新聞肯定係立法會建制派議員嘅WhatsApp群組對話曝光，身兼全國人大代表嘅積金局主席黃友嘉出席完積金局活動都忍唔住要講番兩句。佢認為，呢類群組有存在嘅必要，最緊要係做好保密工夫，佢仲笑笑口咁話「唔用WhatsApp，咪用WeChat（微信）！」
黃友嘉噚日下晝3點主持一個積金局活動，聲稱當時都仲未睇建制派議員嘅WhatsApp群組內容，所以唔評論立法會主席曾鈺成係咪唔夠中立。不過佢話「𠵱家所有嘢都冇乜私隱，我唔知嗰個群組有幾多人，如果有幾十人嘅話，自然好難保密」。咁黃主席快啲開班授徒，教大家點做好保密工夫喇，起碼有班議員想知佢有乜秘技！