立法會上星期表決政改，建制派「等埋發叔」變甩轆，33個建制議員攬炒冇投票。事件餘波未了，八方呢兩日食花生都食到滯，有報章分開上、下集大爆建制派議員當日喺WhatsApp群組嘅絕密對話，大家欣賞建制「豬一般的對話」時，卻被工聯會陳婉嫻嘅發言吸睛，原因係佢喺建制一人一句混亂到不堪之際留言話：「請冷靜！不要令我們被動。」講完仲附上3個符號：太陽花、烏龜、笑面。
好多花生友估緊，呢3個圖案係咪暗藏玄機？有人問嫻姐係咪暗撐太陽花運動，仲嫌民主進程好似龜咁慢？亦有網民拆解為「嫻ee（姨姨）係黃花龜（閨）女」。八方噚日向嫻姐求證過，佢自言鍾意可愛嘢，打訊息時會加一兩個emoji，佢鍾意太陽花，又覺得烏龜代表祥和，所以成日用呢兩款，至於笑面呢，就代表佢自己，呢個圖案會隨心情變，有時會用喊到兩行淚嘅圖案喎。
橄欖爆金句 Tree根串錯字
民建聯陳鑑林（橄欖）都有唔少經典發言，包括喺集體離場後，立法會主席曾鈺成問「玩乜」，佢話：「兩個字是『失敗』！」之後仲話喎：「下面反應好大」。嗱嗱嗱，人哋係講緊建制冇投票，令支持者唔理解同不滿，「下面反應」相信係指立法會大樓下面，唔係講緊身體任何一部份。
講到金句，又點能唔提鍾樹根？八方發現自誇英文水平有95分嘅Tree根將WhatsApp串錯咗做「Whatspp」。玩乜？兩個字：失敗。
李八方
mailto:[email protected]