芬佬龐寶林（Paul）因為有個靚靚寶貝女龐卓欣（Ada）入選今屆港姐16強，由財經版活躍到娛樂版，佢旗下東驥基金咁啱噚日慶祝成立25周年，舉行咗個小型酒會，忙於港姐培訓嘅Ada冇現身，但反而收到一份禮物。
話說Paul噚日講到25周年對一間公司嚟講，雖然好短，但對佢嘅人生就唔簡單，亦有好多客幫襯到退休。近幾年香港樓價飆升，Paul透露，唔少退休客贖回基金，都係為幫仔女圓上車夢，父母確係唔易做。
咁佢本身又有冇呢個煩惱呢？佢就笑笑口咁話，自己已經有幾個物業，Ada想住邊間，就畀邊間佢住，唔會計較咁多，認真廿四孝。
講番東驥發展，Paul透露，公司正在申請前海牌照，計劃跟一間內地公司合作進軍內地資產管理市場，只欠審批呢個東風。