立法會主席曾鈺成被爆喺建制派WhatsApp群組留言，涉嫌有違中立搞出大頭佛後，大批政府中人噚日即改用Telegram，似乎係唔想步建制後塵因為WhatsApp洩密出事。
有泛民議員透露，泛民噚日喺立法會大會完結後，召開緊急會議商討曾鈺成WhatsApp被揭主持有違中立一事後，資訊科技界議員莫乃光就提出專家之言，話WhatsApp唔安全㗎，叫議員可以改裝Telegram，民主黨單仲偕、公民黨毛孟靜同郭榮鏗等聽到，咪即時試吓裝。
訊息會自我毀滅
毛孟靜話喎，覺得Telegram訊息有一分鐘即自我毀滅功能，好似「職業特工隊」，令佢覺得好神奇，但就覺得一分鐘過得太快嘞，希望能夠同朋友維持「兩分鐘的對話」。單仲偕就話，會上聽到莫乃光呼籲咪響應吓，覺得喺電話裝多個app無壞，現時仍然學習緊點用個新app，未知泛民「飯盒會」成員，嚟緊會否改於Telegram開設群組討論。八方發現建制派嘅民建聯陳恒鑌，都喺噚日裝咗Telegram呀。