南韓中東呼吸綜合症（俗稱「新沙士」）仍未放緩，不過香港隊就冇有怕，噚日喺浸大照開世大運授旗儀式，總共有79名學生選手參加下月3至14日喺南韓光州舉行嘅世界大學生運動會，只有13人「縮沙」，團長戴王嘉瑤列出「七必」，確保港隊能完完整整返港。
終於搵到保險公司受保
戴太嘅「七必」包括要上機戴口罩、人多地方要戴口罩、落機及去選手村途中要戴口罩、要注意個人衞生、要做足準備功夫，洗手液、口罩要自備（香港大專體育協會亦會準備探熱針同數百個口罩）、除練習、比賽同開閉幕禮，若冇港隊批准，唔准離開選手村同去人多地方。
第一次做團長就遇到「新沙士」，戴太話唔擔心，「我哋一直都留意住形勢，到禮拜四先決定派隊，好開心大部份選手都簽咗『承諾書』話參加，更開心係我哋搵到保險公司肯受保，保大家回港兩星期內嘅醫療費。」13位因疫情退隊選手分別嚟自體操、跳水、高球、划艇、射擊同羽毛球。
當中最開心莫過於13名劍擊選手，原本佢哋教練因「新沙士」棄戰而全隊冇得去，但最後搵到現役青年軍教練胡兆祥帶隊，胡話自己都參加過世大運，知道係難得嘅機會，所以同家人商量後終答應帶隊。隊員包括亞運獎牌歐倩瑩同埋世少冠軍張藝馨等可如願去世大運。