中證監志玲姐出事，而家成為內地投資者最關心話題。此志玲姐非台灣紅星林志玲，而係發行監管部處長李志玲。中證監上個禮拜六宣佈，李志玲老公違規買賣股票，佢涉嫌職務犯罪。消息公佈前，A股上禮拜五已經大跌，但噚日有傳媒爆料，原來今次係中紀委出手，有人話係噚日A股再插水的主因之一。
內地老鼠倉盛行，基金大戶搵食全靠內幕消息係公開的秘密。去年初中證監拉咗幾個涉及內幕交易基金經理，當時A股亦大跌。因為風頭火勢期間，大戶都唔敢撈貨，以避風頭。
今次情況可能更嚴重。中紀委做嘢，一定拉好多人先有交代，而且志玲姐只是低級幹部，不值得中紀委特登出手，可能已經部署好晒。志玲姐入咗去之後，勢必陸續交代其他大佬，搞到投資界人心惶惶。
黃尹華