律政司話前特首曾蔭權涉貪案唔使3個月就決定是否起訴，令八方諗起因貪污而坐緊監嘅煲呔舊部、前政務司司長許仕仁。
八方聽聞許老爺同新地前聯席主席郭炳江等同案4人自從被囚禁喺赤柱監獄後，一直申請保護，據了解，懲教署因為佢哋身份特殊，安排佢哋囚禁於保護組嘅獨立囚室，避免受其他囚犯騷擾。
有二五仔同八方講，許老爺同郭二少雖然獲保護，可以獨立囚禁，但佢哋每日只有1個鐘放風，到戶外地方伸展筋骨，其餘時間包括食飯都要留喺囚室，而且佢哋要同其他囚犯一樣工作。咁有乜工作適合喺囚室內進行？答案係貼信封等「手作仔」。
八方仲聽聞許老爺同郭二少喺保護組內仲有兩名「猛人」鄰居，就係因偽造已故華懋主席龔如心遺囑而入獄嘅陳振聰，以及大角嘴弒父母碎屍案主犯周凱亮。