最近全社會都為建制派甩轆而狂食花生，但花生呢樣嘢，鹽份高，身為降低食物中鹽和糖委員會主席嘅行政會議成員陳智思，當然唔建議大家食咁多啦。雖則只係喺場外、冇份製造呢場花生賽，但作為建制派，陳智思都好注意健康，唔知係咪覺得要做運動保持腦筋靈活，有起事嚟唔會變咗豬一樣嘅隊友。
八方知佢近日專心加操籃球，點解？原來佢星期六要出席一個活動，同NBA球星林書豪打場友誼波。眼見久經戰陣嘅立法會建制派議員都會臨場大甩轆，自言10年冇打籃球嘅陳智思，都話唔希望比賽當日會出醜，仲笑言：「最怕就係自己本來唔係事件嘅主角，最終卻因為打得核突，無端做咗主角嘛。」陳智思話加操，主要係搵番觸球手感，「起碼射籃時，個波要掂到籃框」。由頭到尾都係講緊籃球，無抽水㗎。