過去二十年，陳奕迅推出了逾五十張專輯，如果要揀一張最唔鍾意的唱片，以為驕傲的Eason會說沒有，怎知他皺眉說：「唔鍾意都多㗎，嗰啲精選碟囉，我唔係唔鍾意啲歌或rundown，我係唔鍾意有好多隻佢哋係冇心機做。」
要求高的Eason狠批唱片公司：「做精選碟應該擺多啲心機，睇得出有冇心思，譬如有啲包裝薄衣衣，得塊好似墊恤衫嘅薄紙，要嚟做CD套喎，睇落輕飄飄，點會令人想買喎！顏色配搭係好奇怪，你唔覺得靚，好多隻都係咁，我好唔鍾意呢樣嘢；佢哋亦從來唔會畀碟我，出咗碟又唔通知我一聲，呢個尊重嚟，算啦，大家冇咗呢個概念好耐！」
至於Eason最鍾意的專輯，就是於2012年推出的《...3mm》，他說：「因為自己同Eric Kwok、Jerlard擺好多心機落隻碟度，甚至將自己童年相變合成照做poster，雖然好多碟都好正，好似《Shall We Talk》，但《...3mm》見證我哋三個成長，講三個已婚男士。」
